28/06/2013 19:00:34

Dritan Dajti në gjyq: dëshmia që askush nuk e priste. Alibi apo fakt ?

''Sajmir Duçkollarin e vrau pas shpine një oficer policie që ndodhej në vendngjarje''

TIRANË - Ka vijuar sot gjyqi i Dritan Dajtit, të akuzuar për vrasjen e katër punonjësve të Policisë së Shtetit në gusht të 2009-ës. Në seancën e sotme gjyqësore Dajti dëshmoi para trupës gjyqësore, duke thënë se nuk është ai autori i vrasjes së policit Sajmir Duçkollari, duke ngritur pretendime se është vrarë nga një nga kolegët e tij.

"Sajmir Duçkollarin e vrau pas shpine një oficer policie që ndodhej në vendngjarje. Sajmir Duçkollari ishte i veshur civil dhe nuk ishte pjesë e operacionit për arrestimin tim. Këtë fakt e vërteton edhe plani i hartuar nga Arian Muça", deklaroi i pandehuri Dajti.

Ekspertiza ka hedhur poshtë pretendimet e të pandehurit, pasi, sipas ekspertizës, oficerit të policisë Sajmir Duçkollarit i është gjetur një plumb në kokë, që ka dalë nga arma e Dritan Dajtit.

Seanca gjyqësore është mbyllur me largimin e Dajtit për shkak të mungesës së avokatit mbrojtës.

Dritan Dajti akuzohet se më 7 gusht 2009 ekzekutoi efektivët e policisë Saimir Duçkollari, Altin Dizdari, Fatos Xhani dhe Kastriot Feskaj, pjesë e skuadrës speciale operacionale, të cilët tentuan ta arrestonin të shumë kërkuarin.

HermesNews - ©2013

Dërgo me email | Stampo artikullin